मनहरी–माघ ४ गते । आगामी माघ १६ र १७ गते आयोजना हुने ल्होछार मेलास्थल मनहरी ७ स्थित बुद्धशान्ति हरित पार्कमा बृहद् सरसफाई गरिएको छ ।
मनकामना सामुदायिक वन उपभोक्ता समूह मनहरी ७ को समन्वयमा सरसफाई कार्यक्रम आयोजना गरिएको छ ।
सरसफाई कार्यक्रम संयोजक सगुन स्याङ्तानका अनुसार ल्होछार मेलाका दिन मानिसहरुको भीडभाड हुने भएकाले सफा स्थानमा बसेर कार्यक्रम हेर्न सकियोस् भन्ने उद्देश्यले सरसफाइ कार्यक्रम आयोजना गरिएको हो ।
सरसफाई कार्यँक्रममा ३ सय भन्दा बढी मानिसहरुले सहभागिता जनाएको स्याङ्तानले बताउनुभयो ।
उहाँका अनुसार शसस्त्र प्रहरीको आइआरटी सुरक्षा पोष्ट, डिभिजन वन कार्यालय राप्ती मनहरी, देउराली युवा क्लव मनहरी ७, सिम्पानी युथ क्लव, मनकामना सामुदायिक वन, सांग छोयफेल गुम्बा, विभिन्न राजनीतिक र सामाजिक व्यक्तित्वहरुको उपस्थितिमा सरसफाई कार्यक्रम भएको हो ।
यही माघ १६ र १७ गते बुद्धशान्ति हरित पार्कमा ल्होछार मेला आयोजना हुँदैछ । मेलामा चर्चित गायक मिलन लामा, ज्योति मगर लगायतका कलाकारहरु सहभागी हुने कार्यक्रम छ ।
